x麗貞君問我打太極拳這麼多年悶不悶？
如果無記錯的話; 相信係第一封女讀者來信, 妳咁賞面,加上「物以罕為貴」的角度, 我又怎能夠唔回覆妳呢？其實太極拳呢家嘢, 唔係一朝一夕嘅事,係要經過長年累月的苦練, 用血汗同眼淚;不屈不撓的精神交織而成, 才有今天的成就。世人都知道：「千里馬常有, 伯樂不常有」, 這才是悶的真諦。以下就係小弟的心聲, 希望大家跟着一齊唱(音樂唔該) ：「多少次, 迎著冷眼與嘲笑, 從沒有放棄心中的理想, 一剎那恍惚若有所失的感覺, 不知不覺已變淡心裡愛(誰明白我？), 愿諒我一生不覊放縱愛自由, 也怕有一天會跌倒oh no！背棄了理想誰人都可以, 那怕有一天衹你共我…….. 。」
《今時唔同往日》
從前全家人得一個電話,仲要擺放在客廳中間,現在幾乎每人一部手提,而且還可以上網,於是少男在fa上看見某少女靚照,並且讚好、留言給她：「我們可以拍拖嗎？」某少女心諗：「糖都未食過你一粒,張相又烚下烚下,於是回覆道：「我Ｘ你」,少男回覆：「我們發展得真快啊！」。
有觀眾問可否再談談「人體彈力」？
再舉例咁講：「敵人硬, 自己柔韌, 地面硬。即敵人是石塊, 自己是彈簧, 利用地面為靠山, 將他彈射開去」, 以上是對「人體彈力」的描述, 但這衹是打定靶而已, 練到能打活靶, 必須配合聽勁、化勁和靈活走位, 學者如有幾年拳藝,大可根據小弟指引達到成功, 當然一分耕耘、一分收穫,那是大家都明白的了。
有讀者睇過小弟劣作之後, 來信問在下的VCD何時出版？余聞之深感汗顏。 根據實情,小弟所出版的書本、開網址、 做廣告、 打擂台等等, 全部自費, 三十多年拳技與搞笑劇作, 無私奉獻, 對社會的確係出咗綿力。不才的原意是將拳理與私人珍藏趣劇短片, 交由電視台製作, 咁樣先至有Ｄ睇頭, 自己財力有限, 恐怕效果唔湯唔水, 劇集出街之後, 亦即VCD出版之時, 電視台既有版權, 就可以翻譯成普通話, 銷售各地。而小弟的知名度自然上升, 估計到時會有電影公司揾我拍戲, 又近聞星爺退居幕後製作, 唔係認屎忽靚,他的搞笑接班人,捨我其誰？
有觀眾問及有關太極拳的下盤要注意甚麼？
其實太極拳練的主要是下盤功夫, 點解咁講呢？因為週身放鬆之後, 整體重量自然集中雙腳, 所以文獻中提到：「上下相隨人難進」「身隨步走，步隨身換」, 足以影響勝負, 。以下談談有關腳的幾個主要部份要注意的事項：
(一) 胯－－它是化解來勁的重要管道, 所以楊式太極拳不主張紮馬, 雖然比較穩健和容易發力, 但缺點是化勁時不夠靈活, 又有被打窄面的危險(對手有時不只一個), 最重要還是下勁上達之路受阻, 故不為楊式所用。
(二) 膝－－它是吸納來勁力道、自我重力送入腳底之門, 所以意識上近乎癱瘓, 保持最大鬆柔度, 才可做到暢順的運作。
(三) 腳－－支撐全身重量,要求全掌放鬆達到與地面全接觸 與大地相感應,隨著歲月、靱力與彈力俱增, 意識上腳與膝配合成兩個大彈簧,重心左右交替, 底盤雖小但靈活轉移, 機動性強。
太極先賢曾說：「太極動腳不動手」,其實是不妄動, 伺機而動。雖然有人誤認小弟嬉皮搞笑,做事不認真, 但談到正經事和關節眼處, 還是大有可為的。
|
