第二十六篇《少結師緣》

有人話我：「為人老實,擔屎唔偷食。」都唔知佢讚我定彈我,心諗：「擔屎點會偷食！擔魚與熊掌睇我偷唔偷食？」(一笑)

友曰：「你文章咁搞笑點諗出嚟？」答曰：「出恭個陣諗出嚟。」對曰：「豈非屎橋？」點只屎橋咁簡單,直頭係屎坑關刀,聞唔聞得,舞唔舞得(文武都唔掂),點解咁講,容我細細道來....。

當我重係小朋友年代,父親做生意,係出口傷人,出口商人至啱,都算有個錢,慈母驚我養唔大,請咗兩個馬姐照顧我,所以可以衣來伸手,食來張口,過著温室保護嘅日子。又經常頑皮、好玩。有書唔讀,但每次考試,都三甲份子 (馬經版述語),不過由尾數返轉頭。嚴父驚我學壞,於是幫我揾咗個姓陳嘅補習先生,陳老師上課日,小的想在老師面前表示自己有料到,又想俾個下馬威佢睇.....竟然同老師講手(過後悔恨前事錯,老來方知少年非),「前句相 信是終點過後,大衆馬迷的心聲」,師曰：「不妨試試」,說著雙手放在背後,小的睇準機會,一拳打過去,眼見即將擊中....咦！不見了他,心中疑惑,原來不知什麼時候,老師已走到我背後,如是者再發幾拳,不要說打不中, 連衫尾都摸唔到,最後想攞番個尾彩,用腳踢之,只見老師輕輕隨手一帶,我竟跌倒在地上,即時起身賠禮,請老師教以武術強身,師笑曰：「拳腳乃雕蟲小技,不足掛齒,我想你讀好書,將來能成大器。」自此用心學習,文武皆 有進步,直至一日.....陳老師家鄉有事請辭,以後再也沒有相見,老師所教拳術正是〝太極拳〞,寫寫吓連身世都交代埋,搞到無Ｄ私隱,唔講住,係咁先。